Muhimmanci da tasirin aiki tukuru a rayuwa
Assalamu Alaikum! Ina yi mana gaisuwa wadda
ta dace da al’umma. Allah Ya kara mana ni’imar rayuwa da zaman lafiya a kowane
lokaci, Amin.
A wannan makon kuma, za mu duba muhimmanci da
tasirin aiki tukuru a rayuwar dan Adam. Har kullum riba da nasara na nan ga
mutumin da ya yi aiki tukuru a rayuwarsa. Domin kuwa komai ka gani a rayuwar
nan, yana da sanadin faruwarsa, kamar kuma yadda babu yadda za a yi ka kama
zomo ba tare da ka ci gudu ba. Duk wani abu mai kima da muhimmanci, ba a
samunsa a haka nan, watau a bagas, kamar yadda masu iya magana kan ce.
Aiki tukuru ba yana nufin ka dawwama, tun
daga fitowar rana zuwa faduwarta kan abu guda ba, a’a, ba haka ake nufi ba. Duk
aikin da za ka yi, ka tabbatar ka ba shi isasshen lokacin da ya dace, kuma ka
aiwatar da shi da gaske ba tare da kasala ba. Sannan ka tabbatar ka ware
lokacin sararawa da lokacin cin abinci da lokacin yin ibada, sannan kuma da
lokacin tashi daga aikin nan naka. Aiki tukuru na nufin ka yi adalci tsakaninka
da aikin kansa da kuma yin adalci ga kai kanka da jikinka, sannan kuma ka yi wa
wanda ya sanya ka aikin adalci. Da ikon Allah, za ka samu biyan bukata daidai
gwargwado.
Gaskiya da rikon amana, abin dubawa ne wajen
gudanar da aikinka ko sana’arka. Su ma wadannan sinadarai ne na sirrin samun
nasarar aiki ko sana’a. Sai dai dole mutum sai ya dode kunnuwansa daga surutan
mutane, domin a wannan zamani, duk wanda ya ce zai mayar da hankali kacokan ga
aikinsa bisa gaskiya da adalci, zai zama wani bako a wurin aikin nasa, domin za
a rika kiransa da wasu sunaye na shagube. Za ka ji ana cewa ‘ina ruwan agogo
sarkin aiki!’ Ko kuma a rika ce masa ‘Gadu mai aikin banza!’ Ko kuma saboda
tsare ka’idar lokaci da ba komai da kowa hakkinsa, sai ka ji ana ce masa ‘wane
bai waye ba.’
Irin wadannan maganganu, kada ka yarda su
karya maka gwiwa, kada ka amince su maido da kai baya. Duk abin da za ka yi, ka
tabbatar kana da yakinin yinsa a zuciyarka, ka tabbatar bisa dokar aiki yake.
Idan ka yi haka, komai daren dadewa, kai ne kan nasara, kuma za ka gane amfanin
tsare aikin naka, za ka ga ranarsa, wata rana. Domin kuwa duk abin da ka bauta
masa, sai ka ci gajiyarsa. Duk abin da ka sadaukar da lokacinka da karfinka da
tunaninka wajen aiwatar da shi, to babu shakka ba zai fadi kasa a banza ba. Za
ka samu sakamakonsa, komai tsawon lokaci.
Wannan al’amari, kamar yadda misalai suka
gabata, mujarrabi ne. Idan ba ka amince ba sosai, tsaya tsaf da ranka ka natsu.
Dubi tarihin wani magabaci da kake ganin ya ci nasarar rayuwa, ko kuma ya kai
kololuwar nasarar aikinsa ko kasuwancisa. Yi masa tambaya cikin kwanciyar rai,
ka ji irin surkukin dajin wahalar da ya ratsa kafin ya kai ga wannan matsayi.
Na tabbata idan dai ya ba ka labarinsa tiryan-tiryan, za ka iske cewa ba haka
nan ya samu nasarar ba. Ba yana zaune haka siddan aka ba shi nasarar ba. Don
haka, raggo dai ba ya suna, kuma duk wanda bai tsaga ba, ba zai ga jini ba,
wanda duk bai gina rijiya ba, ba zai samu ruwa ba.
Don haka, kai dai maida hankali ga aikinka,
komai kankantarsa, komai rashin ingancinsa, ka yi amanna, sannan ka ci
gabadaaiwatar da shi. Babban burinka da farin cikinka na nan tafe wata rana.
Babu mamaki ba za ka zama gagarabadau ba a fagen naka, amma dai za ka iya kawo
canji na alheri ta wanan aiki naka. Watakila ba za ka iya zama farin wata gama
duniya ba, amma kana iya zama wata karamar tauraruwa mai haska ma wasu hanya, a
rayuwarsu. Domin a rayuwar nan tamu, ba a taru aka zama daya ba. Zama ne na
’yan marina, kowa da inda ya sanya gabansa.
Babban darasinmu na yau shi ne, kada mu
karaya, mu jajirce mu yi aiki tukuru, bisa amana da adalci da gaskiya. Allah Ya
taimaka mana, amin. Sai kuma mako na gaba idan Allah Ya kai mu. Wassalam!
