Shafine da ake bude dan wayar da kan mutane abubuwa wanda zai taimakesu a harkokin yau da kullum, mukan taimaka da abubuwa ta bangaren shawarwari, gyaran jiki, kwalliya da su Girke Girke

Girkin Tuwon Masara Miyar Ayayo Da Kubewa

Girkin Tuwon Masara Miyar Ayayo Da Kubewa

Assalamu alaikum uwargida, barkanmu da sake haduwa da ku a wannan fili namu na girke-girke.

A yau na kawo muku yadda ake girka tuwon masara da miyar ayayo da kubewa domin ya kamata mu koma girkin gargajiya kada maigida ya gaji da yawan cin girkin zamani.

Yana da kyau mace ta kware a kowane irin girki. Ta zamo a ko’ina ma tana da ilimin wannan girkin, in har maigida ya saba da cin nau’o’in girke-girkenta, zai wuya ya je unguwa ya ci abinci.

Koda tafiya ya yi zai ji ya kosa ya dawo domin cin tuwon uwargida.

Abubuwan da za a bukata:

  • Garin masara
  • Ganyen ayayo
  • Kubewa danya
  • Albasa
  • Attarugu
  • Sunadarin Dandano
  • Nama
  • Tafarnuwa
  • Man shanu

 

Yadda ake yin hadin: A kai masara injin nika sai a surfa ta, sannan a nika ta yi laushi.

Bayan haka, sai a tankade ta a ajiye a gefe.

Sannan a dora ruwa a kan wuta. Idan ya tafasa sai a debi gari kadan a zuba a ruwa a kada shi sannan a juye a tafasashen ruwan a kan wutar; wannan ake kira talge.

Sai a rufe tukunyar da marufi na tsawon lokaci har talgen ya nuna.

Sai a sake debo garin ana zubawa ana tukawa har ya dan yi tauri sannan a sake mayar da marufin a rufe.

Bayan minti 10 zuwa 15 sai a sauke a sake tukawa sannan a kwashe a ajiye a gefe.

A wanke kubewa danya sannan a yanka ta kanana a zuba a turmi da ’yar kanwa a jajjaga ta sosai har sai ta jajjagu.

Bayan haka sai a kwashe a ajiye a gefe. A tsintsinke ayayo sannan a yayyanka shi kananan sannan a wanke da ruwan gishiri shi ma a wanke a ajiye a gefe.

Bayan haka, sai a jajjaga albasa da attarugu a ajiye su ma a gefe.

A tafasa nama, bayan ya nuna sai a kara ruwa a zuba jajjagen albasa da attarugun a ruwan da manja da jajjagen tafarnuwa su tafasa sosai.

Sannan a dauko jajjagen kubewa da yankakken ganyen ayayon a zuba.

Za a ga miyar ta fara kumfa da yauki.

Haka za a rika gaurayawa har sai miyar ta hadu sannan sai a zuba sunadarin dandano.

Sai a dauko tuwon masarar a zuba masa wannan miya a kai tare da diga mata man shanu.

A yi santi lafiya!



mawallafi:

Shugaban kamfanin Duniyan Fasaha, kuma Babban Editan Mujallar Duniyan Fasaha, mutum ne mai son sanar da mutane abin da Allah ya sanar da shi game da fannoni masu yawa. Mai kokari ne a fannin ilimin, Computer, Web Design, gyaran jiki da sauransu.

No comments:

Post a Comment

TALLA

TALLA

Chanza harshe

Contact Form

Name

Email *

Message *