Yadda Za’a Fita Daga Duk Wani Tsari Na Mtn Da Suke Cire Kudi

Tare da Muhammad Abba Gana {Jikan Marubuta}

Duk da cewar layukan sadarwa da muke aiki da su a wasu lokutan sukan mana zanba ta hanyar cire mana kudade ba tare da kwakkwaran dalili ba haka zalika a wasu lokutan mukan kuma iya taimaka musu kwarai da gaske ta hanyar shiga wani tsari ba tare da sanin ingancinsa ba balle sanin rashin ingancin. 

Sau da dama mutane kan yi korafin cewar sun saka kati a layinsu na sadarwar MTN sai de kafin suyi wani amfani dashi sai su tarar anyi wuff da katin ba tare da wata shaidar an cire ba balle mutum yayi tunanin ya shiga wani tsari. 

Saboda wannan matsalar mutane da dama sun daina amfani da kamfanin sadarwar MTN kuma a mafi yawancin lokutan hakan na faruwa ne saboda shiga tsarin MTN PLAY ko kuma MTN CALLER TONE wadda ko wanne yana mai zamar kansa ne. 

Ba ina nufin su kadai ne tsarin da mutum zai shiga ya zamana ko da yaushe yana cikin jerin masu bada sadaqa fisabilillahi ba tare daya shirya ba ga kamfanin sadarwar MTN sai de sune wasu daga cikin mafi yawancin tsaruka da mutane ke yawan shiga daga lokaci zuwa lokaci. 

Layukan sadarwa suna amfani da wayan nan tsarin ne wajen zalintar al’ummar kasa duk da cewar fadar gwamnatin tarayya da masu hannu da shuni suna kokarin ganin cewar an magance wannan matsalar.

A hakikanin gaskiya wadannan tsarukan suna wahalar fita, wasuma sun gaji da kiran kamfanin sadarwar saboda kokawa ga matsalar daya adda besu haka zalika wasu ma sun gaji da tuntuban masana na kusa domin magance wannan matsalar. 

Insha Allahu yau a Duniyan Fasaha zamu tattauna ne game da hanyoyi da za’a bi wajen magance wannan matsalar cikin sauki amma kafin mu tattauna akan yadda za’a magance matsalar bari mu fara da duba wasu daga cikin matsalolin da kuma yadda ake iya shigansu bisa kuskure ko kuma tare da sani. Wasu daga cikin tsarukan sun hada da:

=>> MTN PLAY

=>> MTN CALLER TONE

=>> MTN DATA RENEWAL 

=>> GAMING

=>> RELIGIOUS SERVICES

=>> MTN BACKUP

==> MTN PLAY: Wannan yana daya daga cikin manyan tsaruka dake da sassa daban-daban domin kuwa ya kasance tamkar uwa, wasu daga cikin sassan sun hada da:-

* Labarun Wasanni: Wanna ya hada da club da kake/kike bibiya ko kuma wadda ba ka/ki bibiya ya dangana da abinda aka zaba.  

* Labarun Siyasa

* Labarun Barkwanci

* Labarun yau da kullum wadda ya kunshi; kasuwa, yanayi, farashi da dai maka mancin haka.

* Labaru na Musamman: Daga tashoshin watsa labarai kamar CNN, BBC, ALJAZEERA, NAIJA da sauran tashoshin.

* Labarun koyon harsuna kamar Turanci, Hausa, Igbo, Yoruba, Pigin da dai sauran su.

* Akwai wani bangare na mussanman wadda ya kunshi Karin Magana, labaran soyayya, kalaman soyayya da dai sauransu.

=> MTN CALLERTONE: Wannan bangarene na musamman daya kunshi sauti kama daga wakokin siyasa, soyayya, rayuwa da dai makamancin haka, wadda mutum zai iya daurawa ga layin sa duk lokacin da ake kokarin kiransa mai makon aji karar agogo na bugawa sai aji wannan sautin da mutum ya zaba.

Ba lallai sai mutum ya zaba ba, a wasu lokutan sukan turo da Karamin akwati a fuskan waya dauke da sako muddin mutum ya danna madannin “Ok” ko kuma “Accept” ma’ana ka yadda kenan bisa kuskure ko sani shikenan ka shiga tsarin zasu zaba maka wakan daya dace da kai sannan wannan wakan ne zai maye gurbin agogon kiranka.

==> MTN DATA RENEWAL: Wannan tsarin yasha ban-ban da wadda mukayi bayi a baya a wannan bangaren kuma yana aiki ne da siyan data. A duk lokacin da mutum ya siya data a layin sadarwansa sukan bada zabi wajen yanke shawaran mai zai auku idan wannan data yakare ko kuma wa’adin sa ya cika wato ya mutu a wasu lokutan mukan zabi ya sake siya. Sai sa a duk lokacin da datan yakare sai ya sake siyan kansa saboda mu muka bada zabin hakan.   

==> GAMING: Wannan tsarin yana yawan aiki ga wasu amfani da salulan taba ka lashe wadda aka fi sani da smart phone a turance, a mafi yawancin wayoyin idan muka lura zamu ga cewar akwai wasu manhaja da suke fitowa wadda ba mu muka saukar ba haka zalika ba mu muka fitar da su ba sukanzo da kansu kuma ba’a iya ciresu face an samu kwararre.

A wannan bangaren akan baiwa mutum damar buga wasanin daban daban na son rai wadda mutum zayyi hakan ba tare da saukar da manhajar ba. Yin hakan shike sa a wasu lokutan suke shanye katin sannan muyi korafin cewar bamuyi komai dashi ba.  

==> RELIGIOUS SERVICES: Wannan tsarin na musamman ne daya kunshi abubuwa ta bangaren addinai kama daga wa’azuzzuka, tafsirai, karatu da dai sauransu; na dukka addinai biyu da muke dasu (Musulunci da kuma Kiristanci).  

==> MTN BACKUP: Wannan yana daga cikin tsarin da mafi yawanci mutane ke shiga musamman lokacin da aka chanza wayar salula, layukan sadarwa sukan iya ganewa a duk lokacin da mutum ya chanza waya ba lallai sai an siya sabo ba, a’a; a duk lokacin da layin sadarwa sim card da ke cikin waya aka ciresa a ka kuma sanya izuwa wani wayar, a wajen su yakan zama sabo sabili ba wajen da yake bane a da.

Amfanin wannan tsarin shine adana wasu muhimman bayanai kama daga sakonni da kuma layukan da aka adana wadda a koda yaushe mutum zai iya dawor dasu idan wata matsala ta auku irin faduwar waya ko kuma idan an bude xender da ita wayar wato an sace sa.

Yadda Za’a Magance Matsalar Cikin Sauki

Domin magance wannan matsalar akwai wasu hanyoyi da zamu iya bi wadda su ke da matukar sauki kuma ba bukatan kashe kobo ko sisi.

Saboda yawan korafe korafe da ake samu kanfanin sadarwar MTN sunyi nasarar fito da wata hanya da mutum zai bi wajen iya ganin duk wasu tsaruka da yake ciki sannan kuma zai iya fitansu a duk lokacin da hakan ya taso.

Shi wannan hanya za’a iya ganin kusan duk abubuwan da muka lissafo da kuma wadda bamu samu damar lissafowa ba amma banda tsarin “MTN Data renewal” Domin shi wannan tsarin yana aiki ne ta bangare daban.

Don sanin tsarukan da mutum ke ciki za’a iya latsa *123# sai a kira, bayan shafin ya budu sannan sai a zabi number na biyar wato “My Services” ta hanyar rubuta lambar a dan karamin akwatin da aka tanadar bayan an rubuta sai a danna madannin “Send” wadda shima an tanadar a kasan karamin akwatin. 

Bayan haka sai a zabi mataki na farko ta hanyar rubuta lamba mai dauke da “Active Services” wadda shine na farko “1” a jerin ababen da aka lissafo, 

 

muddin anbi matakan dai-dai in har mutum yana cikin wani tsari za’a nuno masa dukka ko mai yawansu. 

Domin fita daga tsarin da ba’a bukata ajerin ababen da aka lissafo wa mutum sai a rubuta lambar tsarin a dan karamin akwatin tare da latsa mabullin “Send” wadda ke kasan akwatin da aka danadar.

Misali a layina ina cikin wani tsari mai taken “Callerfeel” wadda shine tsari kadai a yanzu wadda ke dauke da number daya, domin ficewa daga tsarin akwai bukatan saka lambar tsarin a dan karamin akwatin da aka tanadar sannan a latsa madannin “Send”

bayan ya bude zai kawo jerin ababen da mutum zai iya kaddamarwa ga wannan tsarin. Na farko daga cikin jerin ababen da aka lissafo akwai “Accept” wadda shine tabbatar da fita daga tsarin da aka zaba wadda shine muke buka ta a yanzu, sai mu rubuta lamba daya tare da latsa mabullin “Send” 

 

sannan zamu sami sakon cewar mun fita daga tsarin da muka zaba. 

 

Abin Kula: Idan mutum ya kasance yana cikin tsari guda dak zai iya bin matakan dana yi amfani dashi a baya wajen fi cewa daga tsarin. Amma idan ya kasance mutum yana cikin tsari fiye da guda kuma sannan yana son ficewa daga dukka tsarin zai iya bin wannan matakin:

Za’a latsa *123# sannan a kira bayan shafin ya budu sai a zabi number na biyar wato “My Services” sannan kuma sai a zabi mataki na farko mai dauke da “Active Services” wadda shine na farko “1” a jerin ababen da aka lissafo, bayan anyi haka sai a latsa madannin “Send”

hakan zai bawa mutum damar wucewa mataki na gaba wadda za’a zayyano masa duk tsarukan da yake ciki domin ficewa daga duk tsarukan da aka lissafo wa mutum sai a zabi number na biyu mai dauke da “Cancel All” ta hanyar rubuta “88” a dan karamin akwatin da aka tanadar, sannan a latsa madannin “Send” wadda ke karkashin akwatin. 

Shikenan za’a sami sakon ficewa daga duk wasu tsarukan da mutum ke ciki.

 

Dafatan wannan hanyoyin ya taimaka matuka wajen magance matsalar da ake fuskanta a layin sadarwa MTN. Shin akwai wata hanya mai matukar sauki da za’a iya bi wajen magance wannan matsalar wadda ba muyi Magana a kai ba? Za’a iya turo mana ta hanyar tuntubanmu ko kuma ta hanyoyin sada zumuntan mu na WhatsApp da kuma twitter. Asha Ruwa Lafiya!